शतकोत्तर वाटचाल

तपशील

इवलेसे रोप लावियेले द्वारी, तयाचा वेलू गेला गगनावरी...!’ अशीच भावना आपल्या बँकेच्या दैदीप्यमान वाटचालीसाठी करता येईल. सन 1921 मध्ये स्थापन झालेल्या आपल्या बँकेने शतकमहोत्सवी वाटचाल करताना सभासदांना कर्ज देण्याबरोबरच, सभासदांच्या पाल्यांना शिष्यवृत्ती देणे, नियमित कर्ज फेड करणारा सभासद मयत झाला असेल तर कर्जमाफी देणे, सभासदांच्या पाल्यांसाठी उच्च शिक्षणासाठी कर्ज देणे, यासारखे विविध उपक्रम राबवून सभासद, ठेवीदार आणि हितचिंतकांचे प्रेम मिळवले आहे. बँकेने ग्राहकांसाठी अमृत कलश योजना, धनवर्षा, कॅश सर्टिफिकेट, सिल्वर कॉइन, गृहलक्ष्मी बचत योजना, दैनंदिन बचत योजना या माध्यमातून ठेवींची उपलब्धता प्राप्त करून घेतली आहे, तर शुभमंगल कर्ज, उच्च शिक्षण कर्ज, संजीवनी कर्ज, सोनेतारण कर्ज या माध्यमातून गरजूंच्या संसाराला हातभार लावत सभासदांच्या दैनंदिन आर्थिक अडचणींना सोडविले आहे. बँकेने केलेल्या उल्लेखनीय कार्याबद्दल युवक मुद्रा राज्यस्तरीय सहकारी बँक, कराड यांचा पुरस्कार, महाराष्ट्र बँक्स असोसिएशनचा पुरस्कार, अलिबाग, रायगड येथे संपन्न झालेल्या राज्यस्तरीय अधिवेशनात उत्कृष्ट बँक पुरस्कार, महाराष्ट्र शिक्षक संघटना-जिल्हा शाखा, धुळे यांचा पुरस्कार, पणजी-गोवा येथे संपन्न झालेल्या आठव्या राज्यस्तरीय अधिवेशनाचा पुरस्कार, दि महाराष्ट्र बँक्स असोसिएशन लि.,मुंबई यांचा उत्कृष्ट बँक पुरस्कार... असे अनेक मानसन्मान प्राप्त झाले आहेत. धुळे आणि नंदुरबार जिल्ह्यातील सरकारी नोकरांच्या अडचणीच्या काळात त्यांना मदत केली आहे.

तपशील

निष्ठेने, मेहनतीने करत असलेले कुठलेही काम कर्तृत्वाच्या पंखांना बळ देते आणि स्वप्न साकारण्याचा मार्ग सुकर करते, हे सामर्थ्य आपल्याला मोठी आव्हाने पेलण्याची शक्ती देते व त्यातून उभी राहाते एक प्रेरणादायी आदर्श संस्था. संस्थेच्या विकासासाठी मेहनत, व्यवस्थापन कौशल्य आणि गुणवत्तापूर्ण सेवेस फार महत्त्व असते. त्यातूनच निश्चित लक्ष्य साध्य होण्यास मदत होते, त्यासाठी हवी असते ती सकारात्मक ऊर्जा, त्यातूनच ध्येय गाठण्याच्या कर्तृत्वाचा प्रवास पूर्ण होतो आणि संस्था प्रगतीपथावर जाते, तोच विचार आपल्या बँकेने समाजात रुजविला आहे आणि शतकोत्तर वाटचाल यशस्वीरित्या पूर्ण केलेली आहे. निर्णयक्षमता, दृढनिश्चय या बळावर यशस्वी होण्याचा मार्ग सुकर होतो आणि निश्चित यश प्राप्त होते. स्व-सामर्थ्याचा शोध आणि कार्यकुशलता प्राप्त करण्यासाठी बँकेच्या संचालक मंडळ, अधिकारी, कर्मचारी यांची मेहनत बँकेच्या विकासाला पूरक आहे, त्यामुळेच बँकेची आजपर्यंतची वाटचाल दैदीप्यमान आहे. बँकेची गतिमान कार्यप्रणाली व धोरणात्मक निर्णय हे व्यवस्थापनाचे वेगळेपण आहे त्यासाठी विविध समित्या उत्तम काम करत आहेत, याचा उपयोग बँकेच्या व्यवसाय उद्दिष्टपूर्तीसाठी होतो, हे अभिनंदनीय आहे.

तपशील

स्वातंत्र्यपूर्व काळात सन 1922 मध्ये म्हणजेच सुमारे 100 वर्षांपूर्वी स्थापन झालेल्या आपल्या बँकेची शतकोत्तर वाटचाल दिमाखाने सुरू झाली आहे. आपल्या गरजू सभासदांच्या आर्थिक उन्नतीसाठी आणि त्यांच्या दैनंदिन गरजांसाठी बँक उत्तम कार्य करत आहे. सहा शाखा आणि मुख्य प्रशासकीय कार्यालय या माध्यमातून बँकेची सेवा सभासदांना मिळत आहे. समाजातील गरीब तरुणांना उद्योग व्यवसायासह शिक्षणासाठीही प्राधान्याने कर्जे दिली जातात. कोरोनाच्या काळात सभासदांना आर्थिक आणि गृहोपयोगी वस्तूंची मदत बँकेने केली आहे. तसेच चिपळूण आणि महाड येथील पूरग्रस्तांना अत्यावश्यक जीवनोपयोगी साहित्य पुरवून बँकेने आपले सामाजिक दायित्व पार पाडले आहे. कुणबी तथा ओबीसी उद्योजकांसाठी तसेच मराठा आणि ब्राह्मण उद्योजकांसाठी विविध प्रकारची कर्जेबँक देत आहे. महाराष्ट्र राज्य इतर मागासवर्गीय वित्त आणि विकास महामंडळ आणि अण्णासाहेब पाटील आर्थिक विकास महामंडळ या संस्थांच्या माध्यमातून विविध प्रकारे सेवा उपक्रम राबवले आहेत. सभासदांच्या पाल्यांना संस्थापक शिष्यवृत्तीच्या माध्यमातून उच्च शिक्षणासाठी मदत दिली आहे. बँकेने विद्यार्थ्यांच्या शिक्षणासह महिलांसाठीही विशेष योजनांची निर्मिती केली आहे. सभासद, ठेवीदार, खातेदार आणि हितचिंतक, संचालक मंडळ आणि अधिकारी-कर्मचारी यांच्या सहकार्याने बँकेचे उत्कृष्ट कामकाज सुरू आहे. शतकमहोत्सव साजरे करणार्या आपल्या बँकेने आपल्या नावलौकिकाला साजेसे कार्य केले आहे. बँकेला आतापर्यंत बँकिंग फ्रंटीअर्स या बँकिंग क्षेत्रातील मासिकातर्फे अखिल भारतीय पातळीवरील ‘फ्रंटीअर्स बँकिंग अवार्ड-2008’ हा उत्कृष्ट कामगिरीबद्दलचा प्रतिष्ठेचा पुरस्कार प्राप्त झाला आहे, हे अभिनंदनीय आहे.