नामदार कै. भाईसाहेब सावंत सहकारी बँक कर्मचारी पुरस्कार

तपशील

आपण गेल्या 33 वर्षांपासून सहकार क्षेत्रात उल्लेखनीय कार्य करत आहात. महाबळेश्वर तालुक्यातील पाचगणी येथील स्वातंत्र्यसैनिक कै.भि.दा.भिलारे गुरुजी नागरी सहकारी पतसंस्थेत 2005 ते 2010 अखेर संचालक म्हणून काम करताना महाबळेश्वर तालुक्यातील डोंगराळ आणि दुर्गम भागातील महिला तसेच सुशिक्षित बेरोजगारांना स्वयंरोजगारासाठी अर्थसहाय्य उपलब्ध करून देण्यासाठी आपण महत्त्वपूर्ण कार्य करत गरजूंचा संसार उभा केला. जिल्हा बँक सेवकांच्या सातारा जिल्हा कृषी बँक कर्मचारी सहकारी पतसंस्थेमध्ये 1999 ते 2005 अखेर संचालक तसेच मानद सचिव म्हणून कार्य करताना गरजू सभासदांना सहज, सुलभ आणि किमान व्याजदराने पर्याप्त कर्जपुरवठा करणे आणि संस्थेचे संगणकीकरण करण्याच्या प्रक्रियेत आपण महत्त्वपूर्ण सहभाग नोंदवला. वेगवेगळ्या सामाजिक तसेच बिगर सहकारी संस्थांनी आयोजित केलेल्या रक्तदान शिबिरात प्रत्यक्ष सहभागी होत आजपर्यंत 10 वेळा रक्तदान करून सामाजिक जाणीव जोपासली.कोविड-19 महामारीच्या काळात बँकेने स्थापन केलेल्या मदत कक्षामार्फत गरजूंना दवाखान्यामध्ये दाखल करणेकामी मदत करत आपण खर्या अर्थाने ‘कोविडयोद्धा’ झालात. कोरेगाव तालुक्यातील मौजे चिलेवाडी या दुष्काळी भागातील ‘पाणी आडवा; पाणी जिरवा!’ मोहिमेत प्रत्यक्ष सहभाग घेत श्रमदान केले. बँक सेवक सांस्कृतिक कला व क्रीडा मंडळाचे संचालक म्हणून सेवकांच्या कलागुणांना वाव मिळण्यासाठी वार्षिक स्नेहसंमेलनाच्या आयोजनात आपला महत्त्वपूर्ण सहभाग असतो. गणेशोत्सवात मंडळामार्फत सेवक आणि त्यांच्या कुटुंबीयांसाठी विविध नामांकित कार्यक्रमांचे आयोजन आपल्या पुढाकाराने होत असते.

तपशील

राज्यातील सहकारी बँक क्षेत्रात प्राधान्याने कार्यरत असणार्या महेश सहकारी बँकेत वसुली आणि कायदा विभागात सरव्यवस्थापक व आज मुख्य कार्यकारी अधिकारी पदावर कार्यरत आहात. आपण गेल्या 26 वर्षांमध्ये बँकेत विविध पदांवर कार्य केले आहे. बँकेच्या ग्राहकांसह महाराष्ट्रातील विविध बँकांना आपण सर्वतोपरी मार्गदर्शन करत आहात. सहकार चळवळीतील योगदानासाठी सतत सहभाग नोंदवत विविधांगी सामाजिक कार्यात सक्रिय आहात. महेश सहकारी बँक व्यवस्थापन मंडळाने उत्कृष्ट कार्याबद्दल आपणास अनेक वेळा गौरविले आहे. आर्थिक आणि बँक या विषयावरील आपली आठ पुस्तके प्रकाशित असून, या पुस्तकांना अमरावतीचा ग्रंथोत्तेजक पुरस्कार, बँकिंग व्यवस्थापन आणि अर्थशास्त्र विभागातील महाराष्ट्र साहित्य परिषदेचा सुभाष हरी गोखले स्मृती पुरस्कार असे मानाचे सन्मान प्राप्त झाले आहेत. कोल्हापूरच्या कर्नाड बँकिंग रिसर्च अँड डेव्हलपमेंट फाउंडेशनचा सर्वोत्तम वसुली अधिकारी पुरस्कार, पुणे येथील मराठवाडा सेवक प्रतिष्ठानचा मराठवाडारत्न पुरस्कार अशा पुरस्कारांनीही आपणास गौरविले आहे. विविध नियतकालिकांतून आपले मार्गदर्शक लेखन प्रकाशित झाले आहे. आर्थिक आणि बँकिंग विषयावरील राष्ट्रीय-आंतरराष्ट्रीय प्रशिक्षणात आपण सहभाग घेतला आहे. तसेच महाराष्ट्र शासनाच्या यशदा या विभागासह देशभरातील विविध सहकारी आणि बँकिंग संस्थांमध्ये आर्थिक आणि बँकिंग विषयावर आपण व्याख्याने दिली आहेत.

तपशील

महाराष्ट्रातील अग्रगण्य जळगाव जनता सहकारी बँकेत गेल्या 21 वर्षांपासून विविध अधिकारी पदांवर आपण उत्तम कार्य करत आहात. त्याचबरोबर जळगाव जिल्हा नागरी सहकारी बँक कर्मचारी सहकारी पतपुरवठा संस्थेत 2010 ते 2016 या कालावधीसाठी संचालक म्हणून निवडून आलात, या कालावधीत 2010 मध्ये अध्यक्ष आणि 2011 मध्ये उपाध्यक्ष ही पदे भूषविण्याची संधी मिळाली, या काळात पतसंस्थेमार्फत सभासदांकरिता अपघात विम्याचा प्रारंभ करण्यात आला. सहकार भारती आणि जळगाव जनता सहकारी बँकेच्या संयुक्त विद्यमाने जळगावच्या जैन व्हॅलीत संपन्न झालेल्या अखिल भारतीय अर्बन को-ऑप.बँक कार्यशाळेच्या यशस्वीतेसाठी आपण प्रमुख जबाबदारी पार पाडली. सामाजिक जबाबदारीचे भान राखत बँकेच्या गणेश मंडळाच्या माध्यमातून दरवर्षी रक्तदान शिबिर आयोजित करून त्यात आपण स्वतः अनेकवेळा रक्तदान केले आहे. तसेच बँकेच्या गणेश मंडळात सक्रिय सहभाग घेत समाजजागृतीसाठी विविध विषयांवरील देखाव्यांचे सादरीकरण करण्यात आपण सहभाग नोंदवला आहे.

तपशील

सहकार ही समाजातील शेवटच्या व्यक्तीपर्यंत जाणारी आर्थिक वाहिनी आहे, त्या माध्यमातून समाजविकास होत असतो, या जाणिवेतून आपण सहकार क्षेत्रात कार्य करण्यास सुरूवात केली. विश्वास को-ऑप. बँक लि., नाशिक या नामाकिंत बँकेत सन 2004 पासून आपली नियुक्ती झाली. त्यानंतर आपण कार्यकर्तृत्वाने बँकेच्या कामकाजात ठसा उमटवला. कामातील सातत्य व शिस्त यामुळे कनिष्ठ अधिकारी ते वरिष्ठ अधिकारी पदापर्यंत यशस्वी प्रवास केला आहे, यात आपले सेवेतील कौशल्य, वेगळेपणा लक्षात येतो. बँकेतील कामाचे नियोजन, वेळेत काम पूर्ण करण्याची कार्यशैली यामुळे आपल्या कामाचा व्यवस्थापनाचा गतिमानतेसाठी उपयोग होत असतो. बँकेतील कर्मचार्यांशी सुसंवाद तसेच एकोप्याने काम करण्याची कार्यशैली हे आपले वैशिष्ट्य आहे. बँकेच्या व्यवसाय वाढीच्या ‘बिझनेस डेव्हलपमेंट’ प्लॅन मध्ये आपण सक्रीय सहभाग नोंदवला असून, ध्येयनिष्ठा जाणिवेतून काम करत आहात. बँकेच्या भागभांडवल वाढीसाठी आपण उल्लेखनीय काम केले आहे ते बँकेच्या प्रगतीसाठी पूरक ठरले आहे, याचबरोबर सामाजिक, शैक्षणिक, सांस्कृतिक क्षेत्रातही आपली वाटचाल सुरू आहे. नाशिक जिल्हा नागरी सहकारी बँक्स् असोसिएशनतर्फे आयोजित विविध प्रशिक्षण कार्यशाळा, तसेच परिसंवादामध्ये सहभागाबद्दल उल्लेखनीय सहभागातून आपणास गौरविण्यात आले आहे. 03 ते 05 डिसेंबर 2021 या कालावधीत नाशिक येथे संपन्न झालेल्या 94व्या अखिल भारतीय मराठी साहित्य संमेलनात आपणास प्रशासकीय काम करण्याची संधी मिळाली होती, त्याबद्दल संमेलनाचे आधारस्तंभ म्हणून संमेलनातील कार्याबद्दल गौरव करणारा लेख प्रसिद्ध झाला होता, तसेच महिला सबलीकरणाचे यशस्वी पाऊल असलेल्या यशस्विनी सामाजिक अभियान या बचत गट चळवळीत आपण महत्त्वाचे योगदान दिले आहे. अभियानामार्फत राबविण्यात आलेल्या उपक्रमातील आपला सहभाग निश्चित मोलाचा आहे. यशस्विनी अभियानाच्या ‘निर्धार’ या ऐतिहासिक प्रशिक्षण कार्यशाळेतील आपला सहभाग महत्त्वपूर्ण ठरला आहे, तसेच स्त्रीभृणहत्या रोखण्यासाठी ‘जागर हा जाणिवांचा, तुमच्या माझ्या लेकीचा’ पदयात्रेत आपला सहभाग निश्चित सामाजिक हिताची जाणीव जोपासणारा आहे. अपंग मुला/मुलींच्या राज्यस्तरीय क्रीडा स्पर्धेत प्रशासन समितीचे उत्तम काम केले, हे सुद्धा अभिनंदनीय आहे. याबरोबर बँकेतर्फे आयोजित क्रीडा स्पर्धा, गणेशोत्सवातील उपक्रमातील आपला सहभाग लक्षणीय आहे. आपले बहुआयामी कार्य बँकेच्या वाटचालीसाठी अभिमानास्पद आहे.